टेंशन फ्री पार्टी!

0
48
टेंशन फ्री पार्टी!


पुणे टाइम्स टीम

आजच्या धकाधकीच्या जीवनात तणाव हा रोजच्या जगण्याचा भाग झालाय. सणासुदी किंवा पार्टीच्या सीझनमध्ये सगळ्या गोष्टी परिपूर्ण होतील का? तसंच, आपण पार्टीचे यजमान असू तर नियोजन व्यवस्थित होईल ना, पाहुणे खूष होतील ना यामुळेही ताण येतोय. सध्या तर पार्टीचा सीझन आहे. ताण बाजूला सारून पार्टीचा आनंद कसा लुटता येईल, या विषयी…

स्वतःला वेळ द्या

काही काळ तुमच्यासाठी प्रचंड उत्साहाचा पण तेवढाच धकाधकीचा गेला असेल, तर काही काळ ब्रेक घ्या. २४ बाय ७ तास उत्साही राहण्याचा ताण तुम्हाला जाणवत असल्यास तुम्ही तुमच्या स्पेसमध्ये राहून तो क्षण आनंदी राहण्याचा प्रयत्न करा. मूड चांगला व्हायलाच हवा, अशी स्वत:वर सक्ती करू नका.

परिपूर्णतेचा अट्टाहास नसावा

तुम्ही एखाद्या पार्टीचं आयोजन केलं असेल, तर सगळ्या गोष्टी उत्कृष्ट व्हायलाच हव्यात असा आपला प्रयत्न असतो. त्यात पार्टी उच्च प्रतीची असल्यास व्यवस्था आणि लोकांचा सामना करताना तणाव निर्माण होतोच. अशात मुलांच्या अपेक्षांची भर पडते; पण पार्टी ही मित्र-मैत्रिणी आणि परिवार यांच्या भेटीगाठीकरिता असते. त्यामुळे सगळ्या गोष्टी परिपूर्ण व्हायलाच हव्या, हा अट्टाहास चुकीचा आहे.

बिनधास्त करा भटकंती

तुम्ही तणावाखाली असाल, तर बाहेर मोकळ्या हवेत चक्कर मारा. बागेत मोकळ्या हवेत फेरफटका मारताना तुमच्यात स्वतःमध्ये होणाऱ्या बदलांचं किंवा आजूबाजूला घडणाऱ्या गोष्टींचं निरीक्षण करा.

वेळेत झोपा

शांत झोप ही तणावमुक्त राहण्यास मदत करते; पण आजकाल झोपेच्या वेळेची गणितं बदलत चालली आहेत. उशिरा झोपणं आणि अपूर्ण झोप हे घटकही तणावास कारणीभूत ठरतात. त्यात तुम्ही चहा, कॉफी किंवा मद्यपानाचं सेवन करत असाल, तर झोप लागत नाही. त्यामुळे तणावमुक्त राहण्यासाठी वेळेत झोपणं आणि प्रामुख्यानं पूर्ण झोप घेणं महत्त्वाचं आहे. पार्टीच्या दिवशी झोप अपूर्ण झाली असेल, तर पुढं दुपारी ती झोप पूर्ण करा. ती पूर्ण न करता लगेचच वेगात कामाला सुरुवात करू नका.

छंद जोपासा

तुम्हाला कलाकुसरीच्या वस्तू बनवायला किंवा घर सजवायला आवडतं का? जर उत्तर हो असेल, तर वेळात वेळ काढून छंद जोपासा. यामुळे तणाव दूर करण्यास मदत होईल. आवडत्या गोष्टी करण्यात वेळ घालवल्यास ताण जलद गतीनं हलका होण्यास मदत होते.

व्यायाम तर हवाच

सण किंवा कुठल्याही उत्सवादरम्यान येणाऱ्या तणावाला दूर ठेवण्यासाठी व्यायाम हा उत्तम पर्याय आहे. निसर्गाच्या सान्निध्यात फेरफटका मारल्यानं, बागेत काम केल्यानं मानसिक ताण कमी होण्यास मदत होतेच, त्यासोबत चांगली झोपही लागते. व्यायाम शरीरात ऊर्जा निर्माण करतं. शारीरिक क्रिया केल्यानं खडतर काळात मन संतुलित ठेवण्यास मदत होते.

संवाद साधा

तुम्हाला एखाद्या गोष्टीची काळजी किंवा चिंता भेडसावत असेल आणि त्यामुळे विविध मनोविकारांना वारंवार बळी पडत असाल किंवा वाईट आठवणी किंवा परिस्थितीतून तुम्ही जात असाल, तर जवळच्या व्यक्तीशी संवाद साधा. यामुळे तुमच्या भावनांना वाट मोकळी करून देता येते, शिवाय तुमच्या मनातील अनेक प्रश्नांची उत्तरं मिळतील.



Source link

LEAVE A REPLY

Please enter your comment!
Please enter your name here